Rom 10 | LCM | STEP | Keve tungag, kag vubuk lava nei vingag na sokotuk ani God ta ki sapang.

Romans 10

1 Keve tungag, kag vubuk lava nei vingag na sokotuk ani God ta ki sapang. 2 Using napo nas ta kipo agusa alava luai ani God, sikei parik kipa nas ta kipo aupele si selen kapo rikek. 3 Parik kipa kinle ta vilvil akorong ke kapo serei le si God. Kitala atokngai si using ani kakaria ta selen akorong na parik kilapa asel pok tataria si God ani ka vil akorong iria, parik. 4 Au, Karisto nia kapo atapunuk a saupai ang, na ria kipo lomlomon God ka taot iria ta kipo korong e matana.

Vilvil ato ani ri vap aongos

5 Moses kata amalangasai nei salsalik ani vilvil akorong kuli saupai asukang ke,Igenen ang kapo usiusing aro ia, ka to singina. 6 Sikei vilvil akorong po kokelai kuli lomlomon ang kapo antok ta,Ku ago ta lomlomonai musik an nei pakangat im ta si nang ka palak ane metekuku? asi an songo asiang ani Karisto. 7 Vosi nang ka pasiang ane nei mata lulungai? asi an songo alak ani Karisto pelek a mat. 8 Sikei kapo saka posong an nang? Kana asukang ke,Mengen ang kapo ago e ngurum, na e pakangat im. Nia palau nang a mengen i lomlomon ang namempo akuskus tatana. 9 Using man a ngurum ka posong amalangas ta Iesu nia na Volava, na ku lomlomon nei pakangat im ta God kata tak atadut ia pelek a mat io, numai ku sapang. 10 Using a igenen kapo lomlomon ta pakangat ina, e iang ka luk a vilvil akorong ang. Au na nia kapo posong amalangas ta nguruna kala luk a vilvil ato ang. 11 Val mengen nei salsalik kapo mengen ta,Man ta sikei ka lomlomon tatana, parik luai kapa angkoai si duai ani mamaila. 12 Using kapo kovek luai i angpetpetekai nei liuan i ri Iudaia ve ri Elas. Volava kapo sikei palau a Volava ani ri vap aongos, na kapo atautauia iria kipo songo papakangai singina. 13 Usingman a sikei ka songo papakangai si asan i Volava, ka sapang.

14 Au ki saka songo papakangai an singina man parik kipa lomlomon tatana? Au na ki saka lomlomon an tatana man parik kitapa longong lak a akus ina? Na ki saka longong an man kapo kovek i igenen i akuskus tatana? 15 Au ki saka akuskus an man parik kitapa asok vap? Val salsalik ang kapo mengen ta,Vola roron luai ta paspasal si petau po serei ta akus ro ke. 16 Sikei parik ta ria aongos kitapa using a mengen i akus ro. Arai ania si mengen si Esias ta,Volava, si kana kala lomlomon ta kalingamem? 17 Asukang a lomlomon kapo tukulai ina si longong mengen, na mengen ang kapo tukulai ina si akuskus ta Karisto. 18 Naka sui tapai. Sa, parik lak kana kitapa longong? Pua lenginang!Kalingaria katala serei kuli rina aongos, na kari keve mengen katala pasal si mamain ta rina asip. 19 Naka anguan sui an kapa. Ri Israel kana parik kitapa nas? Arai, aino Moses kata antok ta,Naka solo amanas a vingami asi kamimarala musik ani vap ang naka buk iria, vap ang parik kipa matan vap i pilak. E, naka vil amarala luai animita kag lau roron ani vap ang kipo tav malangas. 20 Au na Esias kata kun mengen alava asukang ke,Vap po tav gulegule ang anig, kitala sabonai anig. E, natala akalit pok tatag singiria vap po tav sui gule ang tatag. 21 Au na taun ri Israel akorong kata posong asukang ke,Taun vunga luai natala sesel ta ngono kungag taun a vap longogel na vinga kitmat ang.